2 დეკემბერს პროსახელისუფლებო სარედაქციო პოლიტიკის მქონე მედიამ: POSTV (1;2); დაიჯესტი; საინფორმაციო სააგენტო INFO 9; ნიუსჰაბი; Exclusive News; Exclusive Media და ფეისბუქ-გვერდმა “არ აგარევინებთ” გაავრცელეს ფოტო, რომელზეც ჩანს, რომ ორი აირწინაღიანი პირი ერთმანეთს კოცნის. აღწერაში ვკითხულობთ: “გეი წყვილი “მშვიდობიან” მიტინგზე”.
პროსახელისუფლებო მედიის მიერ გავრცელებული გეი წყვილის ფოტო ხელოვნური ინტელექტით არის გენერირებული. ფოტოზე ხარვეზები შეინიშნება, გარდა ამისა, ავტორს მითითებულია აქვს, რომ მის შესაქმნელად პროგრამა Midjourney გამოიყენა.
მედიის მიერ გავრცელებულ საინფორმაციო ბარათზე ფოტოს ავტორი – დავით აფაქიძე ჩანს. თავდაპირველად, 2 დეკემბერს, მან ფოტოები საკუთარ Instagram-გვერდზე გამოაქვეყნა და დაურთო წარწერა (Collab with Midjourney), რომლის მიხედვითაც ის Midjourney-ის გამოყენებით არის შექმნილი. ეს არის პროგრამა, რომელიც ხელოვნური ინტელექტის მეშვეობით ფოტოებს ქმნის.
გარდა ამისა, Instagram პოსტს დართული აქვს AI info. აღნიშნული მითითების დატანა ავტორს ფოტოს ან ვიდეოს გამოქვეყნებამდე თავად შეუძლია, ასევე, Instagram-ი თავადაც ადებს მითითებას იმ გამოსახულებებს, რომლებიც, შესაძლოა, ხელოვნური ინტელექტით იყოს გენერირებული. ნიშანზე ხელის დაჭერის შემდეგ ვკითხულობთ შეტყობინებას, რომ კონტენტი, შესაძლოა, AI გენერირებული იყოს.
დავით აფაქიძე POSTV-ის მიერ ფოტოს გავრცელებას Instagram Story-ით გამოეხმაურა. ავტორი ტექსტში ადასტურებს, რომ ფოტო ხელოვნური ინტელექტის გამოყენებით არის შექმნილი.
გარდა ამისა, ფოტოზე ხარვეზებიც შეინიშნება. მაგალითად, ორივე ფოტოზე გამოსახულ მოქალაქეებს რესპირატორები უკეთიათ, თუმცა ისინი ერთმანეთს არის შერწყმული. ასევე, პირველ ფოტოზე ჩანს ერთ-ერთის ხელი და დეფორმირებული თითები. აღნიშნული ხარვეზი AI ფოტოებისთვის არის დამახასიათებელი.
მას შემდეგ, რაც 28 ნოემბერს პრემიერმინისტრმა ირაკლი კობახიძემ განაცხადა, რომ მთავრობა ევროკავშირთან მოლაპარაკებების გახსნის საკითხს 2028 წლის ბოლომდე დღის წესრიგში არ დააყენებს, საქართველოს მასშტაბით საპროტესტო აქციები იმართება. აქციის მონაწილეების წინააღმდეგ მიმართულ დისკრედიტაციის კამპანიაში სამთავრობო მედია აქტიურად არის ჩართული. მაგალითად, 2 დეკემბერს პროსახელისუფლებო მედია ამტკიცებდა, რომ აქციაზე შეიარაღებული ადამიანი იმყოფებოდა, თუმცა გამოქვეყნებულ ფოტოზე რეალურად ჩანდა პირი, რომელსაც ხელში შტატივი და კამერა ეჭირა. საქართველოში საპარლამენტო არჩევნების შემდგომ გამართული საპროტესტო აქციების შესახებ “მითების დეტექტორმა” სამთავრობო მედიისა თუ საინფორმაციო სააგენტოებისმიერ გავრცელებული არაერთი მცდარი ცნობა გადაამოწმა.
პოსტების არქივი (1;2;3;4;5;6;7)
სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომლებსაც ამ სტატიის საფუძველზე მიენიჭათ ვერდიქტი, Facebook-მა შესაძლოა, სხვადასხვა შეზღუდვა აამოქმედოს. შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
