მედიაკოალიციის და ამბის თხრობის პლატფორმის- MOVEMENT ერთობლივი დოკუმენტური ფილმი “რუსული კანონის” საფრთხის შესახებ საზოგადოების ინფორმირების კამპანიის ნაწილია. დოკუმენტური ფილმის მიზანია, დაეხმაროს საზოგადოებას, გააცნობიეროს “რუსული კანონის” მიღების რეალური მოტივები და კონტექსტი. ფილმი აჩვენებს, თუ რატომ უწოდებენ ამ კანონს “რუსულს” და რა საფრთხეს უქმნის ის დემოკრატიულ პროცესებს.
ფილმში ნაჩვენებია თავისუფალი მედიის შეზღუდვისა და ხელშეშლის მასშტაბები საქართველოში და მიზანმიმართული, სისტემური შეტევა თავისუფალ მედიაზე, განსაკუთრებით წინასაარჩევნო პერიოდში. ჟურნალისტური საქმიანობის ხელშეშლის სხვადასხვა ფორმას შორის გვხვდება: პარლამენტში დამოუკიდებელი ონლაინმედიის შესვლისა და საკომიტეტო სხდომებზე დასწრების აკრძალვა, რეპუტაციული ზიანის მცდელობები, მაღალი თანამდებობის პირების მხრიდან მიზანმიმართული თავდასხმები და საპროტესტო აქციების გაშუქებისას ჟურნალისტებზე ფიზიკური ანგარიშსწორება.
ფილმში ჩანან იმ მედიასაშუალებების წარმომადგენლები, რომლებიც სარგებლობენ საზოგადოების მაღალი ნდობით და ყველა ხელისუფლების პირობებში გამოირჩეოდნენ პროფესიული სტანდარტების დაცვით. ისინი წარმოჩენილნი არიან არა როგორც მსხვერპლები, არამედ როგორც პროფესიისა და საზოგადოების ინტერესების ერთგული დამცველები, რომლებიც არსებული ზეწოლის მიუხედავად, შეუპოვრად აგრძელებენ მუშაობას.
დოკუმენტური ფილმი ასევე უსვამს ხაზს თავისუფალი მედიის მნიშვნელობას, განსაკუთრებით საარჩევნო პერიოდში, და აჩვენებს პარალელებს რუსეთის გამოცდილებასთან, სადაც მსგავსი კანონის მიღებამ მძიმე შედეგები გამოიწვია მედიის თავისუფლებისთვის.
