მედიის ადვოკატირების კოალიცია ეხმიანება ჭიათურის საკრებულოს სხდომაზე დამოუკიდებელი მედიების „ფორმულას“, „ტვ პირველისა“ და „მთის ამბების“ ჟურნალისტების დაშვებაზე უკანონო უარს. აღნიშნული ინციდენტი წარმოადგენს „ქართული ოცნების“ მიერ მედიის წინააღმდეგ წარმოებული სისტემური კამპანიის კიდევ ერთ მაგალითს, რომელიც მიზნად ისახავს კრიტიკული აზრის შეზღუდვას და ინფორმაციის თავისუფალ გაცვლას.
მედიით გავრცელებული ინფორმაციით, ტელეკომპანია „ფორმულას“ „ტვ პირველისა“ და „მთის ამბების“ გადამღები ჯგუფები ჭიათურის საკრებულოს სხდომაზე არ შეუშვეს. ჟურნალისტის განცხადებით, საკრებულოს სხდომაზე დაცვამ არ შეუშვა, რაც აპარატის უფროსმა ხალხი დიდი რაოდენობით ახსნა. მოგვიანებით, ცნობილი გახდა, რომ სხდომაზე დაისვა საკითხი და გადაწყდა, რომ ამ მედიასაშუალებებს არ ენდობიან და ამიტომ არ მისცეს დასწრების უფლება.
საკრებულოს სხდომა არის საჯარო ღონისძიება და მედიის წარმომადგენლებს მასზე დასწრების კანონიერი უფლება აქვთ. ჟურნალისტებისთვის ამ უფლების შეზღუდვა არის არა მხოლოდ მედიის თავისუფლების დარღვევა, არამედ საზოგადოების უფლების შელახვაც – მიიღოს ინფორმაცია ადგილობრივი თვითმმართველობის ორგანოების საქმიანობის შესახებ.
მსგავსი ინციდენტები წარმოადგენს „ქართული ოცნების“ პოლიტიკის ნაწილს, რომელიც მიმართულია დამოუკიდებელი მედიის გაჩუმებისა და მარგინალიზებისკენ. ჩვენ ვხედავთ კრიტიკული მედიის წინააღმდეგ მიმართულ სისტემურ ზეწოლას, რაც ვლინდება ჟურნალისტების მიმართ ფიზიკურ ძალადობაში, მუქარაში, საქმიანობაში უკანონო ხელშეშლასა და სიტყვიერ შეურაცხყოფაში, სამართლებრივ დევნასა და დისკრიმინაციულ მოპყრობაში ინფორმაციის მიღებისას. აღნიშნული ძალადობის ფონზე, არცერთი დამნაშავე პირი არ არის პასუხისგებაში მიცემული.
მედიის ადვოკატირების კოალიცია სოლიდარობას უცხადებს ყველა ჟურნალისტს, რომლის უფლებები შეილახა. ქვეყნის დემოკრატიული განვითარებისთვის მნიშვნელოვანია მედიაგარემოს რადიკალური გაუმჯობესება, მათთვის სათანადო სამუშაო პირობების შექმნა და უსაფრთხოების უზრუნველყოფა.
