მედიის ადვოკატირების კოალიცია TV25-ის ჟურნალისტებზე თავდასხმის ფაქტს ეხმიანება

15 მარტი 2024

გუშინ, 14 მარტს, ბათუმში, ადგილობრივი მედიის მიერ გავრცელებული ინფორმაციით, “ოცნების ქალაქში” ახლად აშენებული საცხოვრებელი კორპუსის გადასაღებად მისულ TV25-ის ჟურნალისტსა და ოპერატორს მშენებლობაზე დასაქმებულმა პირმა ჟურნალისტურ საქმიანობაში ხელი შეუშალა და სიტყვიერი შეურაცხყოფა მიაყენა. ამასთან ერთად, დაცვის თანამშრომელი ოპერატორისთვის კამერის წართმევასაც შეეცადა.

TV25-ის ჟურნალისტი თეო ფუტკარაძე და ოპერატორი გერა კილაძე „ოცნების ქალაქში“ სწორედ იმ კორპუსის გადასაღებად იმყოფებოდნენ, რომლის მშენებლობაც დასრულებულია, მაგრამ მოსახლეებს, თვეებია, საცხოვრებელ ბინებს არ აძლევენ.

TV25-ის მიერ გავრცელებული ვიდეომასალის მიხედვით, გადამღები ჯგუფი კორპუსის გადაღებას  საჯარო სივრციდან ცდილობდა, საიდანაც გადაღების უფლება ნებისმიერ ადამიანს აქვს. 

მედიის ადვოკატირების კოალიცია მოუწოდებს სპეციალურ საგამოძიებო სამსახურს, დროულად დაიწყოს აღნიშნული ინციდენტის გამოძიება, რომ მედიის წარმომადგენლებისთვის უსაფრთხო სამუშაო გარემო იქნეს უზრუნველყოფილი.

ფოტო: ბათუმელები

ამ თემაზე

ჟურნალისტების დაკავება და თავდასხმა ტვ ფორმულაზე

ტელეკომპანია „ფორმულას“ წინააღმდეგ მიზანმიმართული ზეწოლის კიდევ ერთი შემთხვევა

ვახო სანაიას დაკავების შესახებ

MAC-ონლაინ მედიებისგან საგრანტო ხელშეკრულების დეტალების მოთხოვნა პოლიტიკურად მოტივირებულია

ანტიკორუფციული ბიურო დამოუკიდებელ ონლაინ მედიას საგრანტო ხელშეკრულების დეტალების გაგზავნას სთხოვს