14 მაისს საქართველოს პარლამენტთან რუსული კანონის საწინააღმდეგო აქციის გაშუქებისას გამოცემა „ინდიგოს“ ჟურნალისტს შსს-ის წარმომადგენელმა მცირე ზომის კამერა წაართვა და პროფესიულ საქმიანობაში ხელი შეუშალა.
საბა სორდიას განცხადებით, ის შინაგან საქმეთა სამინისტროს პრესსამსახურს, გენერალურ ინსპექციასა და საზოგადოებრივი უსაფრთხოების მართვის ცენტრს დაუყოვნებლივ დაუკავშირდა, თუმცა კამერა ჟურნალისტისთვის ამ დრომდე არ დაუბრუნებიათ.
საბა სორდიამ აღნიშნა, რომ საპატრულო პოლიციის თანამშრომლებმა უკვე დაკითხეს. “ინდიგოს” ჟურნალისტი სპეციალურმა საგამოძიებო სამსახურმაც დაიბარა გამოკითხვაზე.
გუშინ მიმდინარე საპროტესტო აქციაზე საინფორმაციო სააგენტო „ინტერპრესნიუსის“ ფოტორეპორტიორ გიორგი ჟამერაშვილს პოლიციელმა ფიზიკური და სიტყვიერი შეურაცხყოფა მიაყენა.
“რადიო თავისუფლებასთან” საუბრისას გიორგი ჟამერაშვილმა განაცხადა, რომ “სამართალდამცავმა მას ხელი ჰკრა, ფეხის არეში ხელკეტი დაარტყა, მანამდე კი სიტყვიერი შეურაცხყოფა მიაყენა იმ დროს, როდესაც იგი რუსთაველის გამზირზე, პირველი სკოლის მიმართულებით გადაადგილებას ცდილობდა.”
საყურადღებოა, რომ აქციაზე მიმდინარე ხმაურისა და არეულობის ფონზე ერთი-ერთი მოქალაქის დაკავების პროცესში სამართალდამცველებმა ჟურნალისტი რატი მუჯირი შენობის ეზოში შეიყვანეს. “ფორმულას” ჟურნალისტი ახალგაზრდა მოქალაქის დახმარებას ცდილობდა.
ფოტო: მედიაჩეკერი
